Она юраги

Тез ёрдам машинасида шифохонага олиб кетилаётган жонсарак Раҳима опа кенжатой ўғлининг эртага мактабга киядиган оқ кўйлагини ювиш эсидан чиққани учун эзиларди...

Умр

«Бир пайтлари бу қишлоқнинг кўчалари тор, одамларининг кўнгли кенг бўларди. Ҳозир тескариси...» – дея хўрсинди ўлим тўшагида ётган бобой.

Қисмат

– Ойижон, нега чумолилар қора рангда бўлишади? – дея сўради умид тўла кўзини онасига қадаб.

Бева она ҳорғингина жавоб қайтарди:

– Ҳар дақиқада бир яқини қурбон бўлавергач, кийим алмаштириб юришга вақти йўқда, болажоним...

Надомат

– 3 та қизнинг бахтиёр онаси экансиз!

– Ҳа... Уларнинг фақатгина бахтиёр онаси бор...

«Ёвуз» қарор

Узоқдан уни кўрган йигит «Қанчалик қийин бўлмасин, у билан бугун дўстлигимизга нуқта қўяман...» дея ўйлади. Унга яқинлашгач, фақат учта сўз айтди: «Мен сени севаман!»

Раҳмат БОБОЖОН