Миллий урф-одатлар – миллатнинг турмуш-тарзига сингиб кетган, унинг шаклланиши ва ривожига хизмат қиладиган ижтимоий маданий ҳаётида ўз аксини топган, доим такрорланиб турадиган хатти-ҳаракат, кўпчилик томонидан қабул қилинган хулқ-атвор қоидалари ва кўникмалар кўринишидир. Миллий урф-одатлар бизнинг халқимизда ўзига хос ўзбекона тарихий хусусиятларга эга бўлиб, анъанавий ва замонавий кўринишларда намоён бўлади. Миллий урф-одатлар алоҳида олинган шахс ва миллат доирасида шаклланиб боради. Масалан, ўзбекларда кичикларнинг катталарга салом бериши, эрта туриб уй ҳовлини супуриб-сидириб, меҳмонларга алоҳида иззат-икром кўрсатиш, байрам арафасида бетоб ва қийналганлар, ёрдамга муҳтожлар, қариялар ҳолидан хабар олиш шулар жумласидандир. Мустабид тузум даврида кўплаб урф-одатларимиз эскилик сарқити деб поймол қилинди, бу эса ёшлар таълим-тарбиясига миллий ўзликни асраб-авайлашга ва шу орқали ўзбек миллатининг маънавий ривожига салбий таъсир кўрсатди. Миллий урф-одатлар миллат ва элатнинг тарихи, анъаналари, халқ оғзаки ижоди, санъат ва адабиёти, турмуш тарзи ва бошқа омиллар таъсирида шаклланиб, такомиллашиб боради.

Миллий урф-одатлар миллатнинг, элат ва этник гуруҳларнинг ўзига хос қиёфасини белгиловчи хусусият. Масалан, миллатимизга хос бўлган қудачилик урф-одатлари муҳим аҳамият касб этади. Масалан, шўролар даврида «Бешик тўйи» эскилик сарқити, деб таҳқирланган эди. Ваҳоланки, бешик у билан боғлиқ урф-одатлар миллий маданиятимизнинг таркибий қисми бўлиб келган. Миллий урф-одатлар ва анъаналар ҳар бир миллатда ўзига хос тизимни ташкил этади, халқ томонидан турмуш тарзининг зарурий шарти деб қабул қилинади. Миллий урф-одатларга бефарқлик кишини, миллатни ўзлигидан узоқлаштиради. Миллий урф-одатларда ватанга, миллатга бўлган ҳурмат-эътибор ва садоқат тажассум топади. Мамлакатимизда истиқлол туфайли 130 дан ортиқ миллат ва элат вакиллари урф-одат ва анъаналарини асраб авайлаш, такомиллаштириш учун барча имкониятлар яратилган. Бу ҳол миллатлараро муносабатларнинг ривожи, ўзаро дўстлик ва тотувлик ришталарининг мустаҳкамланишига хизмат қилади.