Мўъжиза

«Агар бу хабарни бешта одамга юборсангиз, мўъжиза содир бўлади». У хабарни ўқиб бўлгач, бир қанча одамга юборди. Бироздан сўнг кайфияти бузилди: «Қани, ҳеч нима содир бўлмадику?» Ёнидаги синглиси ҳазил аралаш: «Шуни англаб етганингизнинг ўзи бир «мўъжиза» эмасми?» – деди пичинг билан опасига...

Метрода

Овоз янгради: «Илтимос, ёш болали, ногирон, ёши катта одамларга жой беринг!»

Қишлоқдан энди келган, сочларига оқ оралаган отахон маъюс жилмайди: «Шаҳарда ҳеч бўлмаганда ер тагида оқибат бор эканку...»

Мактуб

Орадан 20 йил ўтиб ўғилдан хат келди: "Одам бўлишимга оз қолди, она!”

Умидвор она

Шамнинг сўнгги шуълалари тараларкан, она урушдаги ўғлининг кийимлари ёнига неварасига деб тиккан нимчасини мамнун алфозда солиб қўйди...

Тонготар келган почтальон эса қора хатни қандай қилиб Рўзи момога беришни билмай, эшик олдида қолдириб кетди...

Умр

Мен туғилдим...

Мудҳиш хато

– Ойижон, тўққиз ой мени қорнингизда кўтариб юрганмисиз?

– Албатта, қизалоғим...

– Нега унда тўрт ойлик пайтим туғилганман?

Раҳмат БОБОЖОН