Бевақт қўнғироқ

Сапаргулнинг телефони жиринглади:

– Ҳа қизим?

– Ойи, мени олиб кетинг. Мен у билан яшай олмайман.

Сапаргул ҳайрон. Бундан бир ой олдин қизи: "Мен усиз яшай олмайман" дегани учун ўша йигитга узатган эди.

Муслима Мамбетниязова

Қувонч ва қайғу

   У 18 йилдан бери хотинининг ўлган кунини торт ва шампан виноси билан нишонлайди. Қизи бу йил 18 га тўлди.

Шахноза Турсинбаева

   Адолат

– Оға бу дунёда адолат борми?

– Албатта! Яхши ҳам, ёмон ҳам бир кун келиб ўлади. Шунинг ўзи адолат.

Ислам Тилепов

Ишонч

– Йўқ, йўқ. У "алкаш" эмас. У келади. Онам алдаяпти. Кутаман...

Ҳар оқшом шундай пичирлайди қиз, онаси йиртиб ташлаган отасининг боши йўқ суратини қучоқлаб.

Динара Ғайипбаева

Аборт

Хотини:

– Қиз экан.

Эри:

– Кел, яна ҳаракат қилиб кўрамиз.

Мехрибану Мамбетназарова

Сўнгги илтимос

Ислом оғир-оғир нафас оларкан, Худодан сўради:

– Аллоҳим, сўнгги марта онамни кўрсам эди...  У шундай дея кўзларини юмди. Ва онаси унинг қўлларидан тутиб олиб кетди.

Бахтияр Турсинбаев

Қорақалпоқ тилидан Нодирбек ЙЎЛДОШ ўгирди.