БУҒДОЙЗОР

– Бугун қўриқчи йўқ шекилли, молларингни бемалол буғдой оралаб боқиб юрибсизлар?

– Ҳа-да. Отаси оламдан ўтибди, таъзияда ҳозир...

ПАНЖАРА

“Ўлганимдан кейин болаларим ўтинга ишлатар”, – оқсоқол шундай деб панжара ўрнига тут дарахти ўстирганди.

Яқинда “Отамизнинг йилигача битириб олайлик”, – дея болалари тутларни илдизи билан қўпориб, ўрнига пишиқ ғиштдан мустаҳкам девор ўрнатдилар.

ПОЙАБЗАЛ

Келтирилган кийим-кечаклардан бир этикчани кийиб, кўзлари қувончдан порлаган болакайдан волонтёр сўради:

– Бу сенга катта эмасми?

– Ҳечқиси йўқ. Қават-қават қилиб пайпоқ кийсам бўлди!..

ИМОН

Мулланинг “Рўмолсиз аёл – имонсиз!” деган гапидан кейин "Имонсиз!" – деб хотинини калтаклади.

Ўша куни у мастлигидан зўрға оёқда турарди.

АВТОҲАЛОКАТ

– Нега ҳозир автоҳалокат дегани кўп?

– Пора эвазига олинган ҳайдовчи гувоҳномаларининг меваси!

Қирғиз тилидан Нодирбек ЙЎЛДОШ ўгирди.