Қиш йилнинг ўзига хос фасли, кимдир совуқ ва изғирин туфайли уни хушламаса, бошқа биров тоғда чанғи учиш ёки қорбобо ясаш учун қорли кунларни интиқ кутади. Аммо қаҳратон кунлари фаррош ва қор куровчи машина ҳайдовчиларининг қўли-қўлига тегмайди.

Айрим шимолий ўлкаларда эса устма-уст қор ёғавергач, уларни тозалаш машаққатли юмушга айланади. Музламани бартараф этиш учун одатда қум ёки махсус туз сепилади, хавфли сумалаклар лазер таёқчалар ёрдамида туширилади. Исландияликлар эса яхмалак билан курашишда нодатий ечимни топишган.

Исландия пойтахти аҳолиси ва меҳмонлари шаҳар кўчаларида сайр этаркан, муз устида тойилишдан ҳеч қўрқмайдилар. Чунки Рейкьявикдаги барча йўлаклар оролдаги сон-саноқсиз гейзер булоқларидан чиқадиган табиий иссиқ сув билан иситилади.

Иссиқ сув мамлакатда катта ва беминнат энергия манбаи бўлиб хизмат қилади. Таъбир жоиз бўлса, иссиқ сув электростанцияларда электр токига айланади. Иссиқлик энергияси йилнинг барча фаслида шаҳар йўлакларини музлатмай, аҳоли ҳаракатланишига қулайлик туғдиради.

Йўлаклар ҳамиша қуруқ ва тоза,одамлар юриши учун қулай ҳолатда бўлади.

Абдумажид АЗИМОВ тайёрлади.