Туркистонда биринчи жадид матбуот органи – “Тараққий” газетаси Тошкент шаҳрида Исмоил Обидов муҳаррирлигида 1906 йил 27 июндан эътиборан чоп этила бошланган. Унинг таҳририяти Ўратепа кўчасидаги 97-уйда жойлашган эди.

Газетанинг бир йиллик обуна баҳоси 5 сўм бўлган, бир донаси 50 тийиндан сотилган. Газета тўрт саҳифада чоп этилиб, унда эълонлар ҳам босилган.

“Тараққий” газетасининг шиори “Нажот: маслакда сабот, тўғриликда ижобат” деб номланган. Нашр илмий, адабий, сиёсий, фаний, тижорий газета бўлганлиги таъкидлаб кўрсатилган.

Газетанинг атиги 20 сони чиқиб, рус ҳокимияти томонидан ёпилган, муҳаррир қамоққа олинган. Шундан сўнг М.Абдурашидхонов муҳаррирлигида “Хуршид” газетаси чиқарила бошланди. 1907 йил 21 августда “Тужжор” газетаси чиққан. Аммо уларнинг барчаси 5-6 та сони чиққач, фаолияти тўхтатилган. Газеталар сақланиб қолмаган.