Синфдошлар учрашувида бир эркак ўқитувчисидан сўради:

– Мени танидингизми?

– Йўқ, – деб жавоб берди муаллим.

– Наҳотки?!Болалигимда синфдошимнинг соатини ўғирлаган эдим. Соат топилмагунича ҳаммамизни тинтув қилишингизни айтган эдингиз. Уят ва қўрқувдан нима қилишни билмай қолган эдим. Ҳамма мени ўғри деб чақириши кўз олдимга келди. Лекин барчага деворга қараб, кўзимизни юмишимизни айтдингиз. Чўнтагимизни бирма-бир текширишни бошладингиз. Менга навбат келганида, соатни олдингиз... лекин ҳаммани текшириб, тинтувни охиригача етказиб қўйдингиз. Соатни эгасига қайтариб бердингиз ва ҳеч қачон бу воқеа ҳақида сўз очмаган эдингиз. Наҳотки, шу ишни қилган одам ёдингизда йўқ?!

– Йўқ, – деди ўқитувчи. – Ўша куни тинтув пайтида мен ҳам кўзларимни юмиб олган эдим...