Йўлда кетаётсам бир йигит қўл кўтариб машина тўхтатяпти, олдида тўхтадим, йигит машина эшигини очиб:

–Ассалому алайкум, ака, шаҳарга кетяпман, лекин пулим йўқ, телефон рақамингизни берсангиз пул ташлаб қўяман, – деди.

–Ваалайкум ассалом, беҳижолат, ўтиринг, йўлим шу томонга. (Хаёлимда ёш жонига бу ерда пулсиз нима қиляпти, деган ўйлар).

Машинага ўтирди, қаерданлигини, нимага бу ерда пулсиз юргани ҳақида қисқача сўрадим.

Эҳҳе, уни ўн беш ёш десам, ичи тўла гап экан.

Маҳмадона Лақмаев деган гапдон тренингчи ташкил қилган курсларга қатнашаркан, 1 млн 50 минг сўм тўлов қилиб, шунчалар қорни ва мияси гапга тўлдирилганки тўхтатиб бўлмаяпти. Мактаб дарсликларидан ўзимнинг эсимда борларидан савол бердим, жавоб йўқ...

–Ака, китоб ўқийсизми?

–Эврил Туроннинг "Ойнур"ини ўқияпман!

–Сизга дунёдаги энг бой одам Палончининг “Бой бўлишнинг бешта сири” китобини ўқишни тавсия қиламан.

–Хўп ўқийман, лекин менда ҳаммаси етарли. Келажакда қайси касбни эгалламоқчисиз?

– Прокурор бўламан.

–Тренинг учун сарфланган пулни репититорларга сарфлаб, яхши мутахассис бўлишга ҳаракат қилган яхшимасми?!

–Энди ака... – бир дунё гаплар. Ҳайрон қолдим.

–Нега пулсиз, телефонсиз узоқ жойда якка юрибсиз?

–Амалиётдамиз, телефон ва пулларни олиб қолишган, ўзимизга ажратилган жойга бориб, учраган ҳар қандай бегона одам билан музокара ўтказиб, яна қайтиб курсга етиб олиш топширилган.

Ана бўлмаса...

Замона шуни талаб қилаётгандир, балки мен тушунмасман бундай нарсаларни, лекин аниқ билганим – бу йигит ҳозир ўқиши, фанларни мукаммал ўрганиши, бўш вақтида спорт, бирор ҳунар ёки уйдаги баҳорги ишларга ёрдам бериши керак. Пойдеворсиз уй қураётгандек туюлди йигитнинг танлаган йўли, тахминимча бундайлар минглаб топилса ажабмас.

Отаси шу йигитларга томорқани чопишни буюрса ишончим комилки, тап тортмай “Бой бўлишнинг бешта сири” китобини ўқиётганини айтади.

Хуллас, ўн дақиқа ичида бирор фикри ўзгарармикин деб озгина уриндим, бефойда. Менимча ёшларни, айниқса юқоридаги йигитча каби ўтиш давридаги болаларни эҳтиёт қилишимиз керак.

Шерзодбек УМАРАЛИЕВ