– Ука, “қарз дафтари” борми?

– Бор, ака.

– Шу дафтарингиздаги муҳтож оилаларни қарзларини ҳисоблаб айтсангиз,  Рамазон ойида уларни қарзларидан озод қилиб қўйсак дегандик.

Қассоб йигитнинг юзида аччиқ табассум пайдо бўлди.

– Ака, келинг, мана қўлимдаги рўйхат, манави акани кўпчилик танийди,  тагларида “Малибу”,  ўғиллари фалон жойда ишлайди, қарзларини бир йилдан бери беролмайдилар. Манави бойваччанинг уйини кўрсангиз нақ сарой дейсиз, бир ярим йил бўлди, без бўлиб юраверадилар. Қисқаси, рўйхатимдагиларнинг бари шунақалар.

– Менга булар керакмас, етим болалари бор ва камбағал оилаларнинг рўйхатини беринг, ука.

– Ака, сиз айтган оилалар заруратдан 200-300 грамм гўшт олишса, бир ҳафтага қолмай пулини тўлаб чиқиб кетишади. Уларда амал ва бойлик бўлмасаям ор-номус бор. Қисқаси, менинг дафтаримдан сиз излаган одамингизни топа олмайсиз, саломат бўлинг.

Индамадим.

Муҳаммад ИКРОМ