Тошкентдан йўлга чиққан “Нексия” бир соатда Гулистон шаҳрига етиб борди. Пойтахт аэропортидан ҳавога кўтарилган “Боинг-767” ҳаво лайнери бир соатда Нукус шаҳрига бориб қўнди. Миттигина жонзот асалари эса бир соатда 65 километр масофага учди.

Ер сайёраси секундига ўттиз километр тезликда бир соатда коинотда 1 млн 648 минг километр йўлни босиб ўтди. Бир соатда бир млрд километрдан зиёд масофани  кесиб ўтган қуёш нури Сатурн сайёрасига бориб етди.

Бир соатда дунёда 7500 нафар, Ўзбекистонда эса 50 нафар чақалоқ оламга келди. Японларнинг  машҳур “Тойота” компанияси бир соатда бир ярим минг дона автомобиль ишлаб чиқарди.

АҚШ армияси генерали Стивен Хиллсдейл ўз мамлакатида бир соатда одамни Ернинг исталган нуқтасига етказа оладиган технология яратилганини маълум қилди.

Сен эса Тошкентнинг Қорақамиш мавзесидан 76-йўналишдаги автобусга ўтириб, бир соат деганда зўрға Бешёғоч майдонига етиб келдинг.

     Абдумажид АЗИМОВ