Рақс санъати академияси (Арт данcе аcадемй) хореографи Аико Такеучи ўзбек, ҳинд, араб ва бошқа миллий рақсларни профессионал даражада ўрганган.

Аико Ўзбекистонга илк бор 2011-йили келган. Ўзбек миллий рақсларига қизиқиб қолгач, бу сеҳрли оламга ҳеч бир ҳадиксиз шўнғиди. Раққосаларимизнинг ҳар бир имо-ишорасини синчковлик билан ўрганди.

Ўзбекча салом бериб, ўнг қўлини кўксига қўйиб турган бу аёлни кўрганингизда Япониядан келган Аико Такеучи эканига асло ишонгингиз келмайди. Унинг ҳар бир хатти-ҳаракатида ўзбек аёлларига хос муомала, назокатни пайқайсиз.

Аико Такеучи “Тановор”ни ҳақиқий фарғоналик бўлиб ижро этади. “Лазги”га тушганда чин хоразмликка айланади. “Яққу-яқ”ни эса худди Сурхон қизлари каби берилиб ўйнайди. Унинг бу муваффақиятларида моҳир раққосалар Гулмира ва Дилором Мадраҳимоваларнинг муносиб ҳиссаси бор.

Японияда ўтказиладиган туризм фестивалларида, “Ўзбек Наврўзи Японияда!”, “Ўзбекистоннинг мустақиллик куни” каби байрамларда чиқиш қилганида кўпчилик Аикони ҳатто ўзбек деб ўйлаган. Андижон, Хоразм, Бухоро, Сурхондарё рақсларидан иборат “Попури”ни ижро этганида мафтункор ва янгича рақсига ҳамма қойил қолган.

2014-йили Японияда “Буюк ипак йўли” ўзбек рақс ансамблини тузди. Сўнгра “Ширин” болалар ўзбек рақс ансамблига асос солди. Ҳозир унинг шогирдлари ижросидаги рақслар гулдастаси бутун бир концерт репертуарини ташкил этади.

Aiko Takeuchi ҳақидаги видеороликни Youtube каналимизда томоша қилинг.

Чарос ТУРСУНОВА

oyina.uz