Дунёдаги барча ҳайвонларни қириб юборган одамлар дунёда қолган ягона ҳайвон – йўлбарсни излаб юришганди. Йўлбарсдан ҳам кўп эмас, атиги биттагина қолганди.

– Йўлбарсни ҳам топамиз, – деди А одам.

– Топганимизда уни ким гумдон қилади? – сўради Б одам.

– Албатта, мен-да, – деди А одам.

– Нега энди сен? – бараварига сўрашди С ва Д одамлар.

– Чунки мен бошлиқман, – деди А одам.

– Ким сени бошлиқ қилди? Ҳаммамизнинг ҳам дунёда қолган охирги ҳайвонни ўлдириб, тарихга киргимиз келяпти. Шунинг учун уни мен ўлдираман! – деди С одам.

– Йўқ, мен ўлдираман! – деди Б одам.

– Йўқ, мен, – деди Д одам.

Қарабсизки, улар орасида даҳанаки жанг бошланди. Бу жанг ҳеч қанча вақт ўтмай муштлашишга айланди. Ким кимга мушт тушираётганини билмасди. Буни четда кузатиб турган йўлбарс дунёдаги ягона ҳайвон ўзи эмаслигини тушинди…

Мироншоҳ ҲАСАНОВ