Сартарошхонада соч олдирган гулчининг узатган пулини сартарош олмабди.

– Бу ҳафта хайрия тариқасида соч олишга аҳд қилганман, – тушунтириш берибди у.

Гулчи миннатдорлик билдириб, сартарошхонани тарк этибди.

Эртасига эрталаб дўкон очгани келган сартарош остонада бир даста атиргул-у, миннатдорлик сўзлари изҳор этилган хатни кўрибди.

Шу куни унинг ҳузурига соч-соқол олдиргани бир новвой келибди.

– Бу ҳафта хайрия тариқасида соч олишга аҳд қилганман, шу боис пулингизни олмайман, – дебди сартарош, новвой узатган пулни олишдан бош тортиб.

Новвой миннатдорлик билдириб, сартарошхонани тарк этибди.

Эртасига эрталаб дўкон очгани келган сартарош остонада бир сават кулча-ю, миннатдорлик сўзлари ёзилган хат топибди.

Шу куни унинг ҳузурига соч-соқол олдиргани бир амалдор шахс келибди. Аҳвол такрорланибди.

Эртасига эрталаб ишга келган сартарош дўкон олдида бола-чақаси билан турган бир гала амалдорларни кўрибди...

Аҳмед КОРЖИЎҒЛУ