Унинг печи ёқилган иссиқ хизмат машинаси светафорда тўхтади.  Хаёлчан машина ойнасидан ташқарига қараркан,  совуқда хазонларни тўплаётган ободонлик ташкилоти ходимасининг кўкариб кетган бармоқларига кўзи тушиб, қалқиб кетди.

Унинг қалқишига ҳамоҳанг машина ҳам жойидан қўзғалди. Ишхонага кираркан, йўлакда ойналарни артаётган фаррош аёлни кўрди. Муздек сув тўла челакка ранги униққан латтани хўллаб олаётган аёлнинг қўллари ҳалиги ходиманики билан бир хил тусда эди.

У тез-тез юриб хонасига етиб келди. Компьютер олдида клавиатураларни қитирлатганча мук тушиб ишлаётган ҳамкасбларини кўрмаганга олиб тезда столига ўтирди.

Қўлларига қаради,  оппоқ, ажин тушган бўлса-да майингина. Кўнгли жойига тушди шекилли,  мамнун жилмайиб қўйди, сўнг компьютерни ёқди ва севимли сериалини кечаги жойидан давом эттириб томоша қила бошлади.

 Фарзона ФАЙЗ