МАНҚУРТ(ЛИК) — ўзлигини англашдан маҳрум бўлган жамиятнинг хусусияти; кундалик турмушда ўз тарихини билмайдиган, онги паст, инсонийликдан йироқ одамларга нисбатан қўлланадиган тушунча. Мустақил фикрлашдан маҳрум, итоаткор, жисмоний эҳтиёжнинг қулига айланган одамлар манқурт деб аталади. Маълумки, маънавиятли шахс, жамият ва миллат равнақининг бош омили ва пойдеворидир. Шунинг учун ҳам муайян миллатни ўзлигидан маҳрум этиб, қарам қилмоқчи бўлган фотиҳлар, аввало, уни тилидан, тарихидан, маънавий қадриятларидан маҳрум этишга уринган. Босқинчилар миллатга ёт бўлган анъаналарни тиқиштириш орқали унинг турмуш тарзини, миллий ўзлигини ўзгартириб юборишни мақсад қилиб кўйган. Ҳозирги даврнинг долзарб муаммоларидан бири ўзлигини яхши англайдиган, маънавий баркамол авлодни, манқуртликдан холи бўлган замонавий инсонларни тарбиялашдир.