Қуйидаги пародия ўлароқ ёзилган замонавий мақолларни ўқиб гоҳ кулгингиз, гоҳ йиғлагингиз келса ажабмас. Ўзбек халқининг бойлиги саналган мақолларни бундай тарзда бузишдан мақсадимиз баъзи бировларнинг юзига ойна тутиш холос...  

* * *

Жон куйдирмасанг, “подписчик” қайда,

“Рек”ка чиқмасанг, “коммент”, “лайк” қайда.

* * *

Отдан тушсанг ҳам, “тренд”дан тушма.

* * *

Ғоя топган – хор-у зор,

“Лайк” сўраган – азиз.

* * *

“Блогер” бўл, “вайнер” бўл, инсофли бўл.

* * *

“Блогер”нинг оғзи қийшиқ бўлса ҳам, сўзи тўғри.

* * *

“Блогер”нинг айтганини қил,

Қилганини қилма.

* * *

Бировнинг “пост”идан кулмагин зинҳор,

Сенинг ҳам кимлигинг билгувчилар бор.

* * *

Юзсиз “вайнер” – тузсиз “вайнер”.

* * *

Олти “вайнер” ола бўлса,

“Тренд”лардан тушадир.

Тўрт “блогер” тугал бўлса,

“Реелс”лари учадир.

* * *

 “Лайк”лар йиғиб нетарсан,

Бир кун ташлаб кетарсан.

* * *

Бугунги “история”ни эртага қўйма.

* * *

Бир йигитга етмиш “вайн” оз.

* * *

“Инстаграм”инг омон бўлса,

Топар тутаринг ёмон бўлмас.

* * *

“Вайнер”ни “подписчик”ка бепардоз кўрсатма.

* * *

Оз-оздан “лайк” олиб, “вайнер” бўлур,

* * *

Бировни “блок” қилгандан кўра,

Ўзингни сўроқ қил.

* * *

Ит ҳурар, “тренд” давом этар.

Раҳмат БОБОЖОН тайёрлади