Ҳаётий манфаатлар – ҳар бир шахс, жамоа, жамият ва мамлакат ҳаёти учун муҳим аҳамият касб этувчи манфаатлар мажмуасини ифодаловчи тушунча. Маънавият ҳам ҳаётий манфаатларнинг таркибий қисми ҳисобланади. Ҳаётий манфаатлар инсон тафаккурининг босқичма-босқич ривожланиб боришини таъминлаш билан бирга, унинг маънавий шаклланишига ҳам катта ҳисса қўшади. Одатда ҳаётий манфаатларга муносабат орқали маънавият даражасини аниқлаш, ёки аксинча, маънавиятга қараб ҳаётий манфаатлар нималардан иборат эканлигини англаш мумкин. Ҳаётий манфаатларга муносабатда маънавий тарбиянинг аҳамияти беқиёсдир. Чунки ҳар бир шахс маънавий тарбия мезонлари орқали ўз ҳаётий манфаатларини белгилайди. Шахс тафаккуридан мустаҳкам жой олган ҳаётий манфаатлар унинг умр мазмунини ҳам белгилаб беради. Шу жиҳатдан ҳаётий манфаатларни маънавиятдан айри ҳолда тасаввур қилиб бўлмайди.