Қиёмат (арабча ўликларнинг тирилиши, тик туриш, ўриндан туриш) – дунёнинг тугаши ва охират кунининг бошланиши ҳақидаги тушунча. Қуръонда охират кунининг бошланиши билан боғлиқ даҳшатли ҳодисалар, барча мавжудотларнинг ҳалок бўлиши ва қайта тирилиши, бирма-бир сўроқ қилиниб, савоб ва гуноҳлари ўлчаниши, жаннат ва дўзахга киритилиши, дўзах азоблари, жаннат роҳатлари батафсил баён этилган. Қиёмат тўғрисида ислом бағрида шаклланган алоҳида фан йўналишларининг барчасида фикрлар билдириб борилиши, бу тўғридаги маълумотларнинг кенг шарҳланиши ва асрлар давомидаги тарғиботлар одамларни ёвузлик, ёмонлик, ҳаром, динсизлик, бидъат, жоҳиллик ва бошқа жуда кўп иллатлардан тийиш мақсадига хизмат қилиши билан маънавий ҳаётда катта аҳамият касб этган. Одамларда қиёмат кунидаги сўроқдан қўрқиш ҳиссини шакллантириш воситасида маънавий тубанликдан тийилиш, турли-туман эзгу ишларга қўл уриш орқали сўроқ куни шарафланганлар қаторидан ўрин олишга интилиш фикрини шакллантирган. Қиёмат ҳақида Авесто, Таврот, Инжил, Забур каби бошқа динларнинг илоҳий китобларида ҳам қайдлар мавжуд бўлиб, бу матнларнинг моҳияти бир-бирини тўлдириши мумкин.