Шарқона ахлоқ – Шарқ халқлари томонидан инсоннинг инсонга, табиат, дин ва дунё, моддий ва маданий неъматларга, руҳий ва жисмоний ҳиссиётларга муносабатида маълум тартибга солинган меъёрларни ифодаловчи тушунча. Хулқ-атвор, юриш-туриш, тарбия, хушахлоқлик, боадаблик, ота-онага, устозларга ҳурмат-эҳтиром, хушмуомалалик, очиқ юзлилик, вазминлик, камтарлик, ваъдага вафодорлик, тўғрисўзлик ва шу каби маънавий тушунчаларнинг Шарқнинг турли-туман халқлари маданиятида яққол кўзга ташланиб туриши Ғарб дунёсида Шарқона ахлоқ тушунчасининг шаклланишига олиб келган. Шунингдек, Шарқ халқлари тарихини турли томондан ўрганувчи мутахассислар ҳам Шарқда ахлоқ масаласига қадимдан жуда катта эътибор қаратилгани ва асрлар мобайнида бу соҳада эришилган натижалар бутун инсоният тараққиётига катта ҳисса қўшганини таъкидлайдилар.