Фузало (арабча донишмандлар, зиёлилар) – фазилат, билим ва маърифатда устувор бўлган етуклик, камолот эгаларига нисбатан қўлланилган тушунча. Фозил ва иқтидорли кишилар, Ҳақ таолодан етувчи файз сабаб фазилат, лутфга етишиш. У Шарқда икки қисмга ажратилган: бири – файзи ақдас, яъни илм-мартаба орқали эришилса, иккинчиси файзи муқаддас – унга ҳақиқат ва олий моҳият туфайли эришилади. Ҳар икки ҳолатда ҳам фузалолар ўзларида юксак маънавият, маърифатни мужассам этган шахслар ҳисобланиб, улар давлат ва жамият тараққиётига, унинг ривожланишига, фаровонлигига катта таъсир кўрсатган. Хусусан, халқни, миллатни танишда, дунёга танитишда, кишилар орасида меҳр-муҳаббат, эзгулик, одамийликни шакллантиришда уларнинг маънавияти, маърифати муҳим аҳамият касб этади.