ШУҲРАТ

Ҳар бир одамда болалиги яширинган. У айрим ҳолларда мўралаб, ўзини ошкор қилиб қўяди.

* * *

Ёлғизлик ё доно, ёки девонани яратади.

* * *

Тер тўкиб ҳалоллик билан қўлга киритилган ютуқ доим ҳасад туғдиради.

* * *

Инқилоб – муҳожирларни, зулм қочқинларни кўпайтиради.

* * *

Кўпинча астар аврадан қиммат туюлади.

* * *

Қўрқоқ фақат хиёнат қилишдан қўрқмайди.

* * *

Ёмон дўст сояга ўхшайди – қуёшли кунда қочиб қутулолмайсан, булутли кунда қидириб тополмайсан.

***

Унинг муҳаббати кеч баҳорда ёққан қорга ўхшайди. Бир ёқдан ёғса, бир ёқдан эриб кетади.

* * *

Тарбия тақани тўғрилайди.

* * *

Машқ билан бойитиб турилмаган илм тешик челакдан тўкилган сувдек адо бўлади.

* * *

Қидирсангиз, йўқолган олтинни топасиз, лекин йўқотилган вақтни тополмайсиз.

* * *

Меҳрибонлик – муҳаббатнинг элчиси.

* * *

Ўзи ёнмаган шоир бировни ёндиролмайди!

* * *

Сўз – фикр сурати.

* * *

Замон ҳар бир зулмнинг интиқомини ҳам олиб келади.

* * *

Тақдир синови ҳар кимнинг даражасига қараб берилади.

* * *

Оқни қоралаш учун кўп бўёқ керак эмас.

* * *

Нодон судьядан хавфлироқ одам йўқ.

* * *

Тик ўсган дарахтдан қийшиқ соя тушмайди. Ҳақ сўз пардозга муҳтож эмас.

* * *

Ёзганда гапни ўргимчак уясидек тўқимаслик керак.

* * *

Яхши сўз ёнғоққа ўхшайди. Маъносини англаш учун уни чақиб кўрмоқ керак.

* * *

Тикан бўлиб оёққа киргунча, гул бўлиб ёқага санчил!

* * *

Ҳар бир кўкракда юрак бор. Бироқ ҳар бирининг калити ўзга.

* * *

Эркка кураш билан эришилади.

* * *

Инсон қаҳрамонлик кўрсатолмаса ҳам, унга доим тайёр турмоғи шарт.

* * *

Узун тил умрни қисқартиради.

* * *

Табиат хасис, ҳаммага ҳам шоирлик истеъдодини раво кўрмайди.

* * *

Танқид – адабиётнинг шикоят дафтарчаси.

* * *

Бахтнинг оёғи йўқ – ўзи келмайди, унга меҳнат етказади.

* * *

Чиройли қўллар ҳам жаллод болтасини тутиши мумкин. Мен ёшлигимнинг 15-20 йилидан воз кечиб, кексаликка сакраб ўтишга розиман. Лекин ёнимда у, угина бўлса, қўша қарисак...

* * *

Тоққа чиқишга эринманг, баланддан олис-олислар кўринади.

* * *

Шоир қалбдаги шивирни довулга айлантиради.

* * *

Сабабсиз кечирим сўратмоқ – гуноҳ.

* * *

Ақл тиши ҳаммада бор, аммо...

* * *

Умр ёнғоқдек юмалаб ўтади-кетади.

* * *

Энг ёмон қафас – тўрт томони очиқ қафасдир.

* * *

Эртанги кун қайғуга сабаб бўладиган бугунги шодликнинг маъниси йўқ.

* * *

Севгисиз никоҳ – ҳиди йўқ гул.

* * *

Дўстлик заифлашган даврада такаллуф томир отади.

* * *

Гул ҳидлаган одамга атрини юқтиради.

* * *

– Нега бошингизни эгиб ўтирибсиз, буви?

– Ер чақиряпти шекилли, болам.

“Tafakkur” журнали, 2019-йил 3-сон.

“Тўрт томони очиқ қафас”