Умуминсонийлик – инсон, жамият, давлат ва бошқалар учун умумийлик касб этувчи ҳаёт мезонлари, тараққиёт тамойиллари ва қонуниятлари, умумий қоида ва тартибларни ифодаловчи тушунча. Мазкур тушунча ҳаётнинг турли жиҳатлари, хилма-хил ижтимоий сифат ва хусусиятларнинг умуминсоний характерга эга эканини англатади. Бу тушунча турли соҳаларда намоён бўладиган халқаро андозалар, бутун жаҳон аҳамиятига молик жараёнлар, дунёнинг барча ҳудудларига хос воқеа-ҳодисаларга нисбатан ҳам қўлланади. Бир сўз билан айтганда, «Умуминсонийлик» одамлар учун умумий бўлган мезонлар, объектив ҳолатлар, хусусиятлар, шарт-шароитлар ва бошқаларни ўзида акс эттирадиган тушунча сифатида ишлатилади. Умуминсонийлик одамзоднинг яшаши, умргузаронлиги, амалий фаолияти, инсоният ҳаётининг энг умумий соҳаларига тегишли бўлган маънавий тамойиллар, талаб ва ҳодисалар башариятнинг ўтмиши, бугуни ва келажагини, яшашнинг йўналишлари, қонун-қоидалари, талаб ва тартибларини, одамларнинг энг азалий орзу-умидлари ва идеалларини ўзида акс эттиради. Умуминсонийлик жамият аъзоларининг барчаси учун умумий аҳамият касб этади, инсоният ҳаётида рўй бераётган ўзгаришлар, кишиларнинг амалий фаолияти, яшаш тарзи, бошқаларга муносабати ҳам ушбу мезонга мос келиши ёки мос келмаслигига қараб баҳоланади. Мамлакатимиз тараққиётининг ҳозирги даврида умуминсонийлик жамият ва давлат қурилишини ислоҳ қилиш, ҳаётнинг барча соҳаларида туб ўзгаришларни амалга оширишнинг энг асосий тамойили сифатида намоён бўлмоқда.