Бир куни Суқрот ҳакимнинг хотини оғзига келганнни қайтармасдан роса бақир-чақир қилибди. Қараса, эри унга ҳеч жавоб қайтармасдан жимгина ўтирган эмиш. Жаҳлига чидай олмасдан бир челак сувни эрининг бошидан қўйиб юборибди.

Шунда Суқрот:

– Бунчалик гулдурашлардан сўнг бир жала ёғишини кутгандим, – дебди.

***

Машҳур бир файласуфдан:

 – Молу давлат оёқларингиз остида ястаниб ётибди-ю, нега бунча фақирсиз? деб сўрашибди.

– Уларни олмоқ учун эгилмоқ лозим-да, – деб жавоб берибди у.

***

Рақибларидан бири Галилейнинг қулоғи катталигидан кулмоқчи бўлиб:

– Қулоқларингиз бир одамга сал катталик қилмайдими? – дебди мазах оҳангида.

– Менинг қулоқларим бир одамга катталик қилса қилар-у, аммо сизнинг қулоқларингиз бир эшакка кичиклик қилмайдими? – дея жавоб берибди. Галилей.

***

Бир подшоҳ қайси томонга сафарга чиқишини доим сир тутар экан. Бир марта йўлга отланаётганда вазирларидан бири ундан қаёққа кетаётганини айтишини ўтиниб сўрабди.

Подшоҳ ундан:

– Сир сақлашни биласизми? – деб сўрабди.

Вазир:

– Албатта, ҳукмдорим, биламан, – деб жавоб берибди.

Султон унга:

– Жуда соз, мен ҳам биламан, – дебди.

***

Бир ёмғирпўш таъмирловчи одам ёзганларини Шекспирга ўқишга берган экан, қўлёзмани кўрган Шекспир унга: “Азизим, сиз ёмғирпўш тузатинг, ёмғирпўш тузатинг, фақат ёмғирпўш тузатинг”, деб маслаҳат берибди.

***

Франция ҳукумати аъзоларидан бири қайсидир муҳораба чоғида Наполеонни танқид қилар экан, бармоқларини харита устида юргизиб:

– Нима учун дастлаб шу ерни олмадингиз, сўнгра ундан ўтиб, мана бу жойни забт этмадингиз? – каби саволлар бера бошлабди.

Бунга жавобан Наполеон:

– Агар ўша жойларни бармоқ билан олиш имкони бўлганида, ҳеч шубҳасиз, шундай қилган бўлардим, – деган экан. 

***

Бир файласуфдан:

– Омадга ишонасизми? – деб сўрашибди.

– Албатта! Акс ҳолда, аҳмоқларнинг ютуқларини нима деб изоҳлаган бўлардим, – деб жавоб қилибди у.

***

Черчилл оддий халқ билан учрашганда мухолиф партиядан бир аёл унга қаттиқ-қаттиқ гапириб сўзини:

– Агар хотинингиз бўлганимда қаҳвангизга заҳар қўшиб берардим, – деб якунлабди.

Черчилл унга юзланиб:

– Хоним, агар сиз хотиним бўлганингизда заҳар қўшилган ўша қаҳвани жоним билан ичган бўлардим, – дебди. 

Дамин ЖУМАҚУЛ тайёрлади.