Қадим замонда сув ташувчи бир йигит бўлган экан. У обкашининг икки четига илинган челакларда сув ташир экан.

Челаклардан бирининг тагида тешик бўлиб, манзилга етгунча сувнинг ярми тўкилиб борар экан. Бутун челак ўз вазифасини тўла-тўкис бажараётганидан мағрурланар, тешиги эса ишининг ярминигина бажара олаётганидан уялиб, ҳижолат чекар экан.

Бир куни тешик челак эгасига дебди: “Мен сендан узр сўрамоқчиман, олган сувингнинг ярмини етказа оламан, бунинг учун жуда ҳижолатман”.

Сув ташувчи йигит унга жавобан: “Сени кўтариб келадиган томонимдаги гулларни кўрганмисан? Мен уларни атайлаб шу томонга экканман. Ҳар сафар сув ташиганимда сен уларни суғориб кетасан. Йўлакнинг сен томони чаманзор. Кўрганларга қувонч бахш этади. Мен ҳам неча марталаб аёлимга шу гуллардан совға қилганман. Уларнинг ҳаммаси сенинг хизматинг самараси... Бунинг учун сенга раҳмат”, дебди.

Тешик челак эса мамнун ҳолда гулларни суғоришда давом этибди.

Акбаршоҳ РАСУЛОВ