Жаҳон адабиётидаги машҳур асарлар асосида филмлар суратга олиниши, қаҳрамонларига  ҳайкаллар қўйилиши оддий ҳолга айланган. Аммо уларга атаб кичик шаҳарчалар қурилгани ҳақида эшитгансизми?

Гарри Поттер образининг шуҳрати 24 йилдан буён сўнган эмас. Дунё бўйича Жоан Роулингни севиб ўқийдиган, китоб асосида яратилган филмни қайта-қайта томоша қиладиган турли ёшдаги поттерменлар минглаб топилади.

Энди Гаррининг мухлислари унинг оламига бемалол саёҳат қилиши, Ҳогвартга бориб ўқиши, филм қаҳрамонлари билан ёнма-ён юриши мумкин. Токиода янги Гарри Поттер боғининг қурилиши билан мухлислар ажойиб хаёлий оламга қадам қўйиш имкониятига эга бўлади.

Янги шаҳарчада нималарга дуч келиш мумкин? Кино ишқибозлари саҳна ортидаги тажрибаларнинг гувоҳи бўлади, Гарри Поттер таълим олган мактаб билан қизиққанлар дарсларда қатнашиб кўра олади. Қаҳрамонларнинг асил либослари кўргазмаси, филмдан парчалар намойиши ҳам режалаштирилган.

 Лондондаги Гарри Поттер шаҳарчаси.

Боғга ҳозирча 30 минг квадрат фут (3 минг m²) майдон ажратилган. Пиёда сайр қилиш учун тахминан ярим кун керак бўлади.

2012-йили Лондонда ҳам Гарри Поттер шаҳарчаси (майдони 14 минг m²) очилган эди. Ташриф буюрувчилар сони бўйича диққатга сазовор жойлар қаторида тезда юқори ўринларга чиқиб олди. Токиода эса янада ажойиб саргузаштлар бўлиши кутилмоқда.

 Лондондаги Гарри Поттер шаҳарчаси.

Гарри Поттер ишқибозлари янги боғга 2023-йилдан ташриф буюриши мумкин.