Оқкўнгил(лик) – юмшоқ кўнгиллилик, раҳмдиллик, кўнгилчанлик мазмунини англатадиган тушунча. Оқкўнгиллик кишилардаги энг яхши ижобий хислатларни ифодалайди. Оқкўнгиллик «раҳмдиллик» сўзи билан маънодош. Раҳмдил инсон ўзгалар ташвишини ўз ташвиши, хурсандчилигини ўз хурсандчилигидек қабул қилади. Ҳар бир инсонга қўлидан келганича ёрдам беради, ҳеч кимга ёмонликни раво кўрмайди. Шунингдек, оқкўнгиллик «кўнгилчанлик» иборасининг синоними ҳисобланади. Кўнгилчанлик кишига баъзан яхшилик келтирса, баъзан салбий оқибатларга ҳам олиб келиши мумкин. Яхши инсонга қилинган кўнгилчанлик одамга обрў келтиради. Ёмон одамга кўнгилчанлик қилинса, баъзан яхшилик эвазига ёмонлик қайтиши ҳам мумкин. Оқкўнгиллик – ўзбек халқига хос ижобий фазилат.