Огоҳлик – инсон ва миллат манфаатларининг асраб-авайланиши, жамиятдаги ижтимоий-сиёсий қоидаларга риоя қилиниши, мамлакатдаги тинчлик ва барқарорликни таъминлашда ҳушёрликни англатадиган тушунча. Жамиятда мавжуд ижтимоий-сиёсий барқарорликнинг таъминланиши ва асралиши бевосита инсон онги, тафаккури билан чамбарчас боғлиқ. Ҳар бир шахс халқ, жамият, ўз жамоаси, оиласи олдидаги бурч ва масъулияти ҳамда моддий-маънавий неъматларга эгалик ҳуқуқи мавжудлигини англаб, идрок этиши унда огоҳлик туйғусини шакллантиради. Огоҳлик жамият ҳар бир аъзосидан унинг тинч ва осойишта ҳаётдан ҳар томонлама манфаатдорлик туйғуси шаклланишида намоён бўлади. Ушбу манфаатдорликни англаган инсон жамиятда содир бўлаётган воқеа ва ҳодисаларга бефарқ қараб тура олмайди, лоқайдлик қандай оқибатларга олиб келишини тушунади. Огоҳлик лоқайдликнинг аксидир. Мазкур тушунчалар мазмун-моҳиятига кўра, муҳим аҳамият касб этади. Огоҳлик тинчлик ва осойишталик, барқарорликни таъминлашнинг шарти сифатида намоён бўлса, лоқайдлик эса жамият таназзулига замин яратади. Кенг қамровли сиёсий-ижтимоий ислоҳотларни бошдан кечираётган, сиёсий барқарорликни таъминлаш йўлида фаолият юритаётган мамлакатларда огоҳликка амал қилиш ғоят муҳим аҳамият касб этади. Чунки лоқайдлик туфайли бой берилган огоҳлик давлат, жамият ва миллат учун қимматга тушиши мумкин. Огоҳлик туйғуси миллий ўзликни чуқур англаш ва уни эъзозлашга интилишдир. Маълумки, ҳар бир халқ, миллат ўзига хос руҳий ва маънавий феъл-атворга эга. Шунинг учун ҳам турли минтақаларда яшаётган халқларнинг яшаш тарзи, қадрият ва урф-одатлари ўзаро фарқланган. Жумладан, ўзбеклар, умуман, Шарқ халқларида огоҳлик ҳам ор-номус, шарм-ҳаё тушунчалари каби ҳаётнинг барча жабҳаларида муҳим аҳамият касб этиб келган. Жамиятдаги мавжуд қонунларга бўйсуниб яшашни турмуш тарзига айлантирган, ўз хатти-ҳаракатини маълум қонун-қоидаларга таянган ҳолда амалга оширадиган, юксак ақл-идрок, одоб-ахлоқ ҳамда огоҳликни ҳаётнинг ҳар бир дақиқасида намоён қиладиган халқ равнақ топади, жамият маънавияти юксалади, фуқароларнинг эркин ва фаровон ҳаёти таъминланади. Шу маънода, ҳозирги таҳликали дунёда «Огоҳ бўлинг, одамлар!» деган даъватлар кишиларни теварак атрофга очиқ кўз билан қарашга, ҳамиша огоҳ ва ҳушёр бўлиб яшашга чорлайди. Бугунги кунда огоҳлик бебаҳо қадриятларимиз, мустақиллигимиз, тинчлигимиз, ижтимоий барқарорлик, тадрижий тараққиёт, жамиятда миллатлар ва фуқаролар хавфсизлиги учун хизмат қилмоқда.