Мустақиллик ва эзгулик монументи – халқимизнинг узоқ йиллар кутган орзу-армонлари ва эзгу мақсадларини ифодалайдиган рамз, истиқлолнинг дастлабки йилларида Мустақиллик майдонида бунёд этилган Мустақиллик тимсоли. Унда Ўзбекистон Республика харитасининг тасвири акс эттирилган. 2005 йилнинг декабрь ойида Мустақиллик монументи мажмуасига туташ ҳолда қўлида фарзандини ушлаб ўтирган бахтиёр она ҳайкали – Эзгулик монументи ўрнатилди. Бу икки меъморий-бадиий мажмуага Мустақиллик ва эзгулик монументи деб ном берилди. Мустақиллик ва эзгулик монументи халқимизга хос бўлган эзгу фазилатлар – тинчликсеварлик, бағрикенглик, болажонлилик, меҳр-оқибат, самимийлик ва одамийлик хусусиятларини намоён қилади. Мустақиллик майдонига кираверишда Мустақиллик ва эзгулик монументи билан яхлит ансамблни ташкил этувчи Эзгулик аркаси бунёд этилди. Мустақиллик ва эзгулик монументи ҳамда Эзгулик аркаси оқ рангдаги узун ва кенг йўлак билан туташган бўлиб, бу рамзий маънода оқ поёндозни билдиради. Эзгулик аркасининг узунлиги 150 метр, асосий пештоқларининг баландлиги 12 метр, ён томондаги устунларининг баландлиги 10 метр бўлиб, жами 16 та оқ мармардан ишланган устунлардан иборат. Мазкур баланд ва бақувват устунлар мустақиллигимизнинг мустаҳкам пойдеворидан дарак беради. Марказий устунда Ер шари тасвири ўрнатилган, Ер шари устида эса кўкка интилаётган турналар ишланган. Ер шари узра парвоз қилаётган турналар тинчлик ва эзгулик, бахт-саодатрамзини ифода этади. Бугунги кунда давлат миқёсидаги байрам ва тантаналарда, умумхалқ сайлларида ва янги ҳаётга қадам қўйиш олдидан (келин-куёвлар) монумент пойига гул қўйиш анъанага айланган.