Миллий ҳис-туйғу – муайян мамлакат фуқароларининг ижтимоий воқеликда содир бўлаётган воқеа-ҳодисаларни ҳис этиш, унга бўлган муносабат билан боғлиқ руҳий-психологик кечинмалар кўриниш ва шакллари мажмуини ифода этувчи тушунча. У миллий руҳият, маданий-маънавий мерос, урф-одат ва анъаналар, тарихий тажриба билан боғлиқ ҳолда миллат менталитетида яққол намоён бўлади. Турли халқлар ва миллатларда бундай ҳис-туйғуларнинг намоён бўлиш шакллари ўзига хосдир. Бу талай объектив ва субъектив омиллар билан белгиланади. Жамиятдаги турли қатламларда ҳам ўзига хос тарзда намоён бўлади. Масалан, ёшлар миллий ҳис-туйғусида рационаллик билан бирга ҳиссий ўзгарувчанлик, максимализм, онгсиз-руҳий ҳаракатларга мойиллик сезилса, ҳар қандай масалага холислик, вазминлик ва мушоҳада билан оқилона ёндашиш ҳисси ёши улуғларга хос сифатлардир. Мавжуд шарт-шароит, ҳар бир кишига хос темперамент хусусиятлари, миллий-маданий мерос, қадриятларга бўлган муносабат ҳам миллий ҳис-туйғуга таъсир кўрсатади. Ортиқча эҳтиросларга берилмаслик, босиқлик, ақлга таяниб иш кўриш миллий ҳис-туйғуни ифодаловчи муҳим жиҳатларидир. Миллий ҳис-туйғуга мавжуд шарт-шароит билан ҳисоблашмасдан ҳаддан ташқари эрк бериш воқеа-ҳодисаларнинг нохолис баҳоланишига сабаб бўлиши мумкин. Умуман олганда, миллий ҳис-туйғу муайян миллатнинг узоқ давр мобайнида давомида шаклланадиган ва ўзгариб борадиган ўзига хос хусусияти бўлиб, уни эътиборга олиш воқеа-ҳодисаларни баҳолашда, уларга муносабат билдиришда ўзига хосликни яққол намоён этади.