Миллий ифтихор – миллатга хос моддий ёки маънавий ютуқ, муваффақият билан фахрланиш туйғусини ифодалайдиган тушунча. У инсон маънавий камолотининг қирраларидан бирини намоён этади. Миллий ифтихор ўз халқининг асрлар давомида яратиб келган барча моддий ва маънавий бойликлари, тарихий мероси, урф-одатлари, анъаналари, одоб-ахлоқи, турмуш тарзи, юксак маънавияти, барча тарихий ютуқлари ва сабоқларига чексиз ҳурмат ва эъзоз билан муносабатда бўлиш, авайлаб-асрашни ифодаловчи тушунчадир. Миллатининг истиқболи учун қай ғурмайдиган, ўз халқининг тарихини, миллий қадриятларини, тилини, манфаатларини билмаган, қадрламаган, миллий мансублигини унутган кишиларда миллий ғурур ҳам, миллат билан фахрланиш ҳам, миллатпарварлик ҳам бўлмайди. Бундай инсонларни маънавий жиҳатдан камол топган баркамол инсонлар дея олмаймиз. Миллий ифтихорни тиклаш ва ўстириш маънавий ҳаётимиздаги устувор вазифалардан биридир. Инсон табиатига ўзини муайян ижтимоий гуруҳ, қатлам, тоифа, миллат, давлат, минтақа, давр ёки сулола билан боғлаш хосдир. Шу боис шахс ўз қавми, миллати ва давлатининг эришган ютуқларидан қувониш, уни янада бойитиш ва келажак авлодларга қолдиришга интилиши табиий маънавий ҳодисадир. Халқлар, миллатлар тарихий тараққиётининг туб бурилиш даврларида жамиятнинг янгиланиши туфайли миллий ифтихорни тиклаш ва ўстириш миллий давлатчилик қурилиши билан бевосита боғлиқ бўлиб қолади. Миллий маънавий-маданий қадриятларни атрофлича ва батафсил ёшлар онги, қалбига етказиш, уларни аждодлар яратган маънавий бойликлар билан озиқлантириш миллий ифтихорни тиклаш ва ўстириш омилидир. Бу миллат тарихини ўрганиш, англаш, қадрлаш орқали амалга оширилади.

Ўзбек халқи ҳаётида миллий ифтихор ўз миллатининг буюк шахслари ҳаёти ва тақдирини ўрганиш билан янада юксалади. Миллий ифтихорнинг яна бир вазифаси халқни, миллатни бирлаштиради, юксак мақсадлар сари олға бошлайди. Эзгу мақсадларимизга эришиш, жаҳон миқёсида ўзимизга муносиб ўрин эгаллаш, Ватанимизнинг истиқлолини ҳимоялаш, авваламбор, ўзимизга, ўзимизнинг имконият ва салоҳиятимизга, азму шижоатимизга боғлиқ эканини шу юртда яшаётган ҳар қайси инсон чуқур тушуниб олишини тақозо қилади. Шу борада сиёсий, ҳарбий, иқтисодий омиллар қаторида миллий ифтихор туйғуси ҳам ўта муҳим мезон ҳисобланади. Миллий ифтихор шундай буюк қудратки, тарихда бу кучга таяниб-суяниб, кўплаб халқлар энг мураккаб синовлардан, давр суронларидан омон чиққан ва бошқанинг ҳавасини уйғотадиган эркин ва фаровон ҳаёт қуришга эришган. Одамларимиз онги ва жамиятимиз мафкурасида юрт тинчлиги, Ватан равнақи, халқ фаровонлиги ғоялари етакчи ўрин тутишига ҳаракат қилинаётгани бежиз эмас. Миллий ғурур, миллий ифтихор барча ишларимизнинг пойдевори бўлмоғи керак. Бу муқаддас ғоялар, миллати ва эътиқодидан қатъи назар, шу юртда, шу заминда яшаётган ҳар бир инсон, ҳар бир фуқаронинг ҳаётига, онгига сингмоғи, ҳар биримиз учун энг катта таянч ва ишончга, ҳақиқий маслакка айланиши лозим.