Миллий давлатчилик – муайян миллатнинг ижтимоий-иқтисодий, сиёсий, маънавий қадриятларига, манфаатларига асосланган, жамият ижтимоий-тарихий тараққиёти натижасида шаклланган давлатнинг шакли. Бирор ҳудудда мутлақ кўпчиликни ташкил қилган миллий этник гуруҳлар ижтимоий ҳаётни ташкил қилиш учун бирлашиб, ўзларининг манфаатларини ҳимоя қилувчи давлатни вужудга келтиради. Миллий давлат уни ташкил қилган миллатнинг дунёқарашига, анъаналарига, руҳтиятига мос келади. Давлатчилик тарихан таркиб топган ҳодиса бўлиб, халқнинг ижтимоий ҳаёти, тақдири билан узвий боғлиқ ҳолда шаклланади ва ривожланади. Тарихий тажриба шуни кўрсатадики, давлатчилигидан марҳум бўлган миллат ривожида миллий емирилиш, парокандалик жараёнлари авж олади. У ўзининг миллий давлатини тиклашга эришсагина ижтимоий ва миллий тараққиётнинг истиқболини аниқ белгилаш имконига эга бўлади. Миллат ўз қадриятларини сақлаб қолишни хоҳлар экан, миллий давлатчилик учун курашади. Чор Россиясининг босқинчилик сиёсати натижасида Марказий Осиё халқлари миллий давлатларидан маҳрум бўлдилар. Уларнинг миллий манфаатларига зид бўлган босқинчи давлат минтақа халқларининг миллий давлатчилик анаъналарини оёқости қилгани, шўро даврида эса миллатларни аралаштириб йўқ қилиб юбориш сиёсати юритилгани оқибатида маҳаллий халқлар ўзларининг миллий қадриятларидан узоқлашди, бегоналашди. Ўзбекистон халқи мустақиллик шарофати билан миллий давлатчиликни шакллантириш ва ривожлантириш имкониятини қўлга киритди. Бу миллатимиз тақдирида ҳал қилувчи тарихий ҳодиса бўлди. Минг йиллар давомида шаклланган, халқимиз менталитетига мос бўлган миллий давлатчилик анъаналарига асосланиб, мустақил миллий давлат пойдевори барпо этилди. Истиқлол йилларида мамлакатимиз ҳаётининг барча соҳаларида амалга оширилаётган туб ислоҳотлар жараёнида давлатимиз бош ислоҳотчи сифатида олдимизда турган буюк мақсадларга эришиш йўлида етакчилик қилиб келмоқда. Бу бир томондан миллий давлатчилик анъаналаримизнинг такомиллашувига, иккинчи томондан, юртимизда озод ва обод Ватан ҳамда фаровон ҳаёт барпо этишга хизмат қилиши шубҳасиздир.