Мақол – қисқа, чуқур маъноли, нутқда кенг қўлланадиган, барқарор шаклга эга халқ оғзаки ижоди жанрларидан бири. Мақоллар халқнинг, миллатнинг интеллектуал, маданий, маърифий, маънавий савиясини қисқа ва лўнда фикрларда ифода этиш даражасидир. Мақоллар халқнинг кўп асрлик ҳаётий тажрибалари асосида юзага келади. Мақоллар хилма-хил мавзуларда бўлиб, турмушнинг турли масалаларини қамраб олади. Мақол нутқ жараёнида муайян вазиятда фикрни лўнда, таъсирчан, образли тарзда ифодалашда жуда ҳам қўл келади. Кўпинча ўгит, насиҳат мазмунида бўлади. Мақол ўз табиатига кўра, нутқда кўчма ёки ўз маъносида қўлланади, яъни айрим мақоллар фақат кўчма («Қуш уясида кўрганини қилади»), баъзан ўз маъносида («Деҳқон бўлсанг, шудгор қил») ишлатилади.