Маиший турмуш – инсоннинг ўз жисмоний қуввати ва меҳнатга қобилиятини тиклаши учун зарур бўлган дам олиш, ҳордиқ чиқариш ва ҳаётдан завқ олиши билан боғлиқ ҳаёт тарзини англатувчи тушунча. Маиший турмуш даражаси инсон учун қулай шароитни таъминлашга хизмат қиладиган ижтимоий инфратузилма ривожи. Кишиларнинг моддий ва маънавий турмушини яхшилаш кўп жиҳатдан маиший-коммунал, жисмоний тарбия ва спорт, маданият, савдо, жамоат транспорти, алоқа муассасаларининг фаолиятига боғлиқ бўлиб, улар кишиларнинг маданий савияси ва маънавий қиёфасининг юксалишига таъсир кўрсатади. Масалан, жойларда таълим уй-жой, коммунал, тиббий хизматларининг сифати, электр энергияси, ичимлик суви, табиий газ билан таъминланиш ҳолати, маиший хизмат, маданият муассасаларининг мавжудлиги ва улардан фойдаланиш имкониятлари, жисмоний тарбия ва спорт билан шуғулланиш шароитлари (болалар спорт майдончалари, спорт клублари ва бошқа), турар-жойларнинг ободлиги – буларнинг барчаси маиший турмуш такомиллашувига хизмат қиладиган омиллардир. Кейинги йилларда бу борада амалга оширилаётган ҳамда изчил давом эттирилаётган улкан бунёдкорлик ишлари халқимизнинг маиший турмуш шароитини тубдан яхшилаш, маданият ва маънавиятини юксалтиришга қаратилган.