Мажбурият – инсон зиммасига юкланган вазифа, масъулият, ижтимоий ҳаёт иштирокчиларининг ўзаро муносабатларини ифодалайдиган жиҳатларидан бири. Шахс, жамият, давлат ва индивидларнинг ўзаро алоқаларини тавсифлайди. Ана шу муносабатларни белгиловчи меъёр талаблари доирасида субъект томонидан ўз хулқ-атвори ва унинг оқибатлари, ҳаракат қилиш мажбуриятининг ижтимоий аҳамиятини англаш, идрок этишини билдиради. Мажбуриятнинг ижтимоий меъёрлар мазмунига боғлиқ ҳолда маънавий-ахлоқий (ахлоқ меъёрлари), сиёсий (сиёсий меъёрлар), юридик (ҳуқуқий меъёрлар) ва бошқа турларини келтириш мумкин. Маънавий-ахлоқий мажбурият бурч тушунчаси билан узвий боғлиқ бўлиб, ҳар бир инсон томонидан жамият, ўз оиласи, яқинларига нисбатан маънавий бурчини теран ҳис этиш, ахлоқ талабларига қатъий риоя этган ҳолда фаолият юритиш, юрт, Ватан тақдири учун масъулиятни чуқур англаган ҳолда ҳаракат қилишни англатади.