Маданиятсизлик – инсониятнинг моддий ва маънавий бойликлари, кашфиёт, янгилик, ижод намуналари, маиший ва маънавий соҳаларда эришилган ютуқлар, қадриятлар, маданият ва маънавиятдан бебаҳралик ёки маданий бойликларга беписандлик, тарбиясизликни ифода этадиган тушунча. Маданиятсизликни таълим-тарбия, маънавий-маданий, маърифий тадбирлар воситасида бартараф этиш, кишиларнинг маданий савиясини ошириш, юксалтириш мумкин. Юртимизда маданият янгиликларини оммалаштириш ва кенг тарғиб этиш мақсадида театр, клуб, музей, кутубхона, марказ ва саройлар, турли хил маданият ўчоқлари, тарбия ва таълим муассасаларини барпо этиш ва фаолият самарадорлигини ошириш борасида амалга оширилаётган саъй-ҳаракатлар ана шу мақсадни кўзлайди.