Маданият ва маънавият ўчоқлари – маданий масканлар, театр, кино, музей, кутубхона, санъат саройи, маданият ва истироҳат боғлари, маънавият ва маърифат маркази, болалар ва ўсмирлар ижод марказлари, ОАВ, нашриётлар, таълим масканлари мажмуини англатадиган тушунча. Кейинги пайтда улар сафига халқаро ва миллий-маданий марказлар, халқ амалий санъати билан шуғулланадиган кичик корхоналар, фирмалар ва хусусий устахоналар, оила, маҳалланинг қўшилиши халқ оммасининг ижтимоий-маданий ҳаётда фаол иштирокини таъминлайди. Мустақиллик йилларида юртимизда маданият ва санъат иншоотларини барпо этиш билан бир қаторда аждодларимиз қолдириб кетган улкан маданий мерос ва тарихий ёдгорликлар қайтадан тикланмоқда, таъмирланмоқда. Шу мақсадда кўплаб қонунлар, фармон ва қарорлар қабул қилиниб, ўз ижросини топмоқда. Ушбу ҳужжатлар миллатимиз маданияти, санъати, қолаверса, миллий маънавиятимиз тараққиётида ҳуқуқий асос бўлиб хизмат қилмоқда.