Конституциявий бурч – ҳуқуқий демократик давлат ва фуқаролик жамияти қуриш ҳамда уларнинг ривожини таъминлаш учун адо этилиши, бажарилиши мажбурий бўлган вазифа ва мажбуриятлар. Барча ривожланган давлатлар конституциясида фуқароларнинг бурчларига алоҳида ўрин ажратилган. Мустақил Ўзбекистон Конституциясида фуқаролар ва давлатнинг бурчларини белгилашда миллий тарихий хусусиятлар, ривожланган мамлакатлар тажрибаси инобатга олинган. Конституциявий бурч Ўзбекистон давлати ва фуқароларининг Конституцияда белгилаб қўйилган, бажарилиши шарт бўлган мажбуриятларидир. Фуқароларнинг Конституциявий бурчлари қуйидагилардир: барча фуқаролар Конституцияда белгилаб қўйилган бурчларини бажариши шарт; Ўзбекистон Республикасининг ҳар бир фуқароси Конституция ва қонунларга риоя этишга, бошқа кишиларнинг ҳуқуқлари, эркинликлари, шаъни ва қадр-қимматини ҳурмат қилишга мажбурдир; фуқаролар Ўзбекистон халқининг тарихий, маънавий ва маданий меросини асраб-авайлашга мажбурдир; маданият ёдгорликлари давлат муҳофазасидадир; фуқаролар атроф табиий муҳитга эҳтиёткорона муносабатда бўлишга мажбурдир; фуқаролар қонун билан белгиланган солиқлар ва маҳаллий йиғимларни тўлашга мажбурдир; Ўзбекистон Республикасини ҳимоя қилиш – мамлакат ҳар бир фуқаросининг муқаддас бурчидир; фуқаролар, қонунда белгиланган тартибда, ҳарбий ва муқобил хизматни ўташга мажбурдир. Ўзбекистон Республикаси Конституциясида давлатнинг бурчлари ҳам аниқ-равшан белгиланган. Улар қуйидагилардан иборат: давлатнинг халқ иродасини ифода этиши, унинг манфаатларига хизмат қилиши, республика ҳудудида истиқомат қиладиган барча миллат ва элат вакилларининг тили, урф-одат ва анъаналари ҳурмат қилинишини таъминлаши ва бошқа конституциявий бурчлардан ташқари, Конституцияда акс этмаган, лекин амалдаги қонун ва меъёрий ҳужжатларда ўз ифодасини топган бурчлар ҳам бор (масалан, ота-онага ҳурмат, фарзандларга ғамхўрлик, меҳнат ва ишлаб чиқариш интизомига риоя қилиш ва ҳоказо).