Фридрих НИТШЕ

·        Кимки куннинг учдан икки қисмини ўзига ажратолмаса, билингки, у қулдир.

·        Хиралик, бетакаллуфлик танқидда эмас, мақтовдадир.

·        Табиат қўйнида ўзимизни енгил сезамиз, зеро, у устимиздан ҳукм чиқармайди.

·        Ким билан гаплашмайин, ҳокимиятга ўчликни кўрдим.

·        Мақтаганинг сари кимдир уялади, кимдир безбетлашади.

·        Бурчларимиз – бошқаларнинг бизга нисбатан ҳақ-ҳуқуқидир.

·        Ҳамдардликнинг зарҳал ғилофида гоҳида ҳасад ханжари туради.

·        Ҳаётим енгил кечсин десанг, подадан ажралма.

·        Ёнғоқнинг пучлигини аниқлаш учун ҳам уни аввал чақиб кўрмоқ керак.

·        Ғолиблар тасодифга ишонмайди.

·        Ахлоқ – инсоннинг Табиат қаршисидаги манманлиги.

·        Фикрлар – туйғуларимиз кўланкасидир.

·        Ёлғизга шовқин ҳам далда.

·        Чўққи ва жарлик – иккиси ҳам бир гўр.

·        Худбинлик – ҳурлик аксидир.

·        Ҳар нарсага қизиқувчилар – бахтиёр инсонлардир.

·        Ҳиссиётни илоҳийлаштириш муҳаббат деб аталади.

·        Агар одамлар фақат ҳамдардлик сабабли садақа берганда эди, тиланчилар очликдан қирилиб битарди.

·        Юқорига қанча кўтарилганимиз сайин пастдагилар кўзига шунча майда бўлиб кўринаверамиз.

·        Жазо одамни тийиши мумкин, бироқ тузата олмайди.

·        Буюк воқеалар буюк фикрларнинг туғилишидан бошланади.

·        Сен мени алдаганингдан эмас, балки бундан буён сенга ишона олмаслигимдан хафаман.

·        Мусиқани ҳис қилолмайдиганларга рақс тушаётган одам савдо­йидек кўринади.

·        Сенинг ўз йўлинг бор, менинг ўз йўлим. Энг яхши, энг тўғри, ягона йўл... ундай йўл мавжуд эмас.

·        Баъзан одамлар ширин ёлғонлари чилпарчин бўлишини истамагани учун ҳам ҳақиқатни эшитгиси келмайди.

·        Ақлли инсон нафақат душманини сева олмоғи, айни чоғда дўс­тидан нафратлана билиши ҳам керак.

·     Алоҳида инсонларда жиннилик кам учрайди. Аммо гуруҳлар, партиялар, миллатлар ва даврлар учун бу – нормал ҳолат.

 Олмон тилидан Мирзаали АКБАРОВ

таржимаси

“Tafakkur” журнали, 2017 йил 3-сон