«Муҳаммад исми ҳақида маъруза қилганда бир домла: «Ким «Муҳаммад» исмли болани сўкса имондан чиқади ва никоҳи бузилади», — дедилар. Муҳаммад исмига яна бир исм қўшиб қўйилган бўлса ҳам шундай бўладими?» Ўзбекистон мусулмонлари идораси фатво ҳайъати мазкур саволга жавоб берди.

«Муҳаммад» исми пайғамбаримиз (с.а.в.)нинг исмлари экани маълум. Агар бу исмни бирор инсонга қўйилса, ўша инсоннинг исми ҳисобланади. Бу инсонни чақирилса ёки исми айтилса, унга саловат айтиш каби Расулуллоҳ (с.а.в.)га оид ҳукмлар қилинмайди. Саволда сўралган нарса ҳам мана шундан келиб чиқади. Агар Муҳаммад исмини айтиб Расулуллоҳни назарда тутиб сўкса, у шаксиз диндан чиқади. Бироқ шу исмли болани сўкиши билан бу ҳукм собит бўлмайди. Чунки ота болани тарбиялаши учун айрим ҳолатда қаттиққўллик қилишига тўғри келади. Бироқ бундай номдаги инсонга шу исм қўйилса, унга эҳтиром қилиши афзал саналади. Уни қисқартириб, ёки бошқача қилиб айтиши мумкин эмас, дейилади унда.