Замонавийлик – муайян замон ўзгаришлари ва давр даъватини, тараққиёт талабларининг мазмун-моҳиятини чуқур ҳис этиб яшаш; ҳаётда ҳар томонлама ўткир ва долзарб аҳамият касб этаётган масалалар, даврнинг ўзи кун тартибига кескин қилиб қўяётган янги вазифаларни бажариш борасидаги ҳозиржавобликни англатадиган тушунча. Ушбу тушунча бугунги авлоднинг ўзи бошидан кечираётган аниқ тарихий вақт кесими билан ҳамнафас, ҳамфикр эканини, ўзини ўтмиш, бугунги кун ва қолаверса, келажак олдида масъуллигини англаши, замонавий ҳодисаларни аниқ тасаввур қила олиш қобилиятини ифодалайди. Замоннинг барча талабларини чуқур ҳис этиш, яъни тарихни яхши билиш ва ҳис этиш, бугунги кун хусусиятларини теран англаш ва фаол бўлиш, келажакни яхши тасаввур этиш ва аниқ мақсадга эга бўлиш – буларнинг барчаси шахс маънавиятининг муҳим кўрсаткичларидир. Демак, айнан шундай салоҳиятга эга бўлган кишиларгина замонавий тафаккурга эга бўлиши ва ўз келажагига чуқур ишонч билан қарай олиши мумкин.