«Жамиятимизнинг янги қиёфаси» – Президент Ш.Мирзиёев томонидан асослаб берилган ва халқимиз тараққиётининг ҳозирги босқичига мос равишда юзага келаётган, кенг қамровли ислоҳотлар ва туб ўзгаришлар жараёнида шаклланаётган Янги Ўзбекистоннинг замонавий қиёфасини акс эттираётган тушунча. Ушбу тушунча қотиб қолган воқелик ёки ўзгармас аксиомани англатмайди, балки халқимиз ҳаётининг ҳамма соҳалари ва жамиятимизнинг барча жабҳаларида рўй бераётган ўзгаришлар ва янгиланишларнинг муқаррар натижаларини акс эттиради. Шу билан бирга ушбу тушунча мамлакатимизда амалга оширилаётган ислоҳотларнинг бош мақсади инсон, унинг ҳаёти, қадр-қиммати, эҳтиёжлари ва манфаатларига қаратилганлиги ҳамда фуқаролар ҳуқуқлари ва эркинликлари том маънода қадриятга айланаётгани ва ўзгаришлар ҳамда янгиланишларнинг асл мақсад ва муддаоларни ҳам ифодалайди. Айни пайтда мамлакатимизнинг бар қарор ривожини таъминлаш билан боғлиқ замонавий парадигмаларга асосланадиган янги жамиятни барпо этиш ғояси халқимизнинг барча қатламлари томонидан қўллаб-қувватланаётгани ва унинг бу ғоя атрофида жипслашаётгани ҳам жамиятимизнинг янги қиёфасини барпо этиш жараёнининг мазмун-моҳиятини акс эттиради.

Жамиятимизнинг янги қиёфаси тушунчасида Ўзбекистонни эркин ва бахтли одамлар яшайдиган қудратли ва салоҳиятли давлатга айлан тириш, бу борада мамлакатимизни дунёнинг 50 та ривожланган, иқтисодиёти бар қарор ўсаётган, инсон капитали юқори бўлган рақобатбардош демократик давлатлари қаторига киришини таъминлашга ҳаракат қилинаётгани яққол намоён бўлмоқда. Ушбу тушунчанинг мазмун-моҳиятида бугунги дунёнинг кўплаб мамлакатлари «тўртинчи саноат инқилоби» арафасида турган бир пайтда, мамлакатнинг инновацион ривожланиш йўли дан жадал ҳаракатланиши, «рақамли иқтисодиёт», «эркин ахборот жамияти» ҳамда инсон парвар «ахборот майдони»ни шакллантиришга ҳаракат қилинаётгани ҳам ўз ифодасини топган.

Бугунги кунга келиб, ушбу феноменал тушунча жамиятимиз ҳаёти, халқимиз қалби ва онгидан чуқур жой олиб, ислоҳотлар жараёнига катта таъсир кўрсатмоқда. Натижада бу жараёнда халқимизнинг ҳаётий талаб ва эҳтиёжларини таъминлаш, одамларимизни рози қилиш йўлидаги залворли ишлар ўз моҳияти ва аҳамиятини яққол намоён қилмоқда. Жамиятимизнинг янги қиёфаси тушунчаси учун асос бўлаётган ва унда ўз аксини топаётган энг муҳим жиҳатлар ва амалий ҳаёт мезонлари аввало, бутун мамлакатимизда ислоҳотлар ва янгиланишларнинг кенг кўламда амалга оширилаётганлиги, энг муҳими, рақобатбардош ва ташқи олам учун очиқ ижтимоий-иқтисодий маконни барпо этишга собитқадамлик билан киришилгани каби тамойилларга таянади.

Жамиятимизнинг янги қиёфаси тушунчасининг такомили мамлакатимизни ривожлантириш бўйича Янги Ўзбекистон стратегияси тўлиқ амалга ошириш масъулиятининг бутун халқимиз томонидан чуқур ҳис этилаётгани ва ушбу мақсад йўлида аҳолининг барча қатламлари, ҳокимиятнинг вакиллик ва ижро органлари, фуқаролик институтларининг имкониятлари ишга солинаётгани; жамият қурилиши ва давлат бошқаруви янгиланиб, «Халқ давлат идораларига эмас, балки давлат органлари халққа хизмат қилиши лозим» деган умуминсоний тамойилга амал қилинаётгани билан узвий боғлиқдир. Бу жиҳатдан, ушбу жараён «Халқ бой бўлса, давлат ҳам бой ва қудратли бўлади» тамойили асосида барчанинг мулк ҳуқуқини ҳурмат қилиш, шахс, жамият ва давлат манфаатлари уйғунлиги тамойили жорий этилган кучли фуқаролик жамияти, конституциявий парламент демократияси, эркин бозор иқтисодиётининг мамлакатимиз ва халқимиз равнақининг асосига айланаётганини ҳам ифодалайди.

Буларнинг барчаси жамиятимизнинг янги қиёфасини яратиш, учинчи Ренессанс пойдеворини барпо этиш йўлидаги ислоҳотларнинг қатъият ва собитқадамлик билан амалга оширилаётганини англатади. Зеро, жамиятимизнинг янги қиёфаси ана шундай серқирра ислоҳотлар жараёнида барпо бўлмоқда, унинг замонавий қиёфаси босқичма-босқич шаклланиб бормоқда. Лекин бу осонгина амалга ошмаслиги, янги жамият биноси бир кунда тикланиб қолмаслиги аниқ. Инсон манфаатлари устувор бўладиган эркин ва фаровон ҳаёт жўнгина шаклланмаслиги шубҳасиз ва бу жамиятимизнинг янги қиёфасини яратиш борасида барчамизнинг зиммамизда улкан масъулият мавжудлигидан далолат беради.