Ёлғон – жамиятда, кишилар ўртасидаги ўзаро муносабатларда намоён бўладиган салбий иллат. Ёлғон сўз азалдан барча халқлар томонидан туҳмат, бўҳтон, чақимчилик, манманлик, қўрслик, қўрқоқлик, бепарволик сингари ўта жирканч иллатлар сифатда қораланиб келинган. Ёлғон сўз, ёлғон хабар жамиятда ҳам, маҳаллада ҳам, оилада ҳам жиддий оқибатларга олиб келиши, кишилар орасига нифоқ солиши, оилаларнинг бузилишига, мамлакатда парокандаликнинг юзага келиши сабаб бўлиши мумкин. Айниқса, ахборот-коммуникация воситалари, техника ва технологиялар тараққий этган ҳозирги даврда ёлғон хабарнинг қанчалик машъум, бузғунчи роль ўйнаши, халқаро муносабатларда алғов-далғовларни келтириб чиқариши мумкинлигини кўрсатмоқда. Дарҳақиқат, ёлғон сўз, ёлғончилик, ёлғон хабар ўзининг маъно-мазмуни, моҳияти билан кишилар ўртасидаги, жамиятдаги ҳамжиҳатликка раҳна солиб, меҳнат жамоалари, оила ва маҳаллада тинчлик-аҳилликни бузишга йўналтирилган бўлади. Шу маънода, ёлғон сўз, ёлғончилик – адолат, ҳақиқат, тинчлик-осойишталик, жамиятдаги бунёдкорлик ва яратувчанлик, ташаббускорлик ва тараққиётга тўсқинлик қиладиган маънавиятга зид иллатдир.