Дўзах (форсча жаҳаннам) – жаҳонда тарқалган диний таълимотларга кўра, диний талабларни бажармаган, эътиқоди суст, гуноҳкор бандалар охиратда жазоланадиган жойни англатувчи тушунча; жаннатнинг зидди, унга қарама-қарши мазмунни ифодалайдиган атама. Қадимги динларнинг дўзах ҳақидаги тасаввурлари ўша давр одамларининг ҳаётда ёмонлик, ёвузлик қилишдан қайтариб, кўпроқ яхшиликка интилишга чорлаган. Миллий динлар, айниқса, жаҳон динлари: буддавийлик, христианлик ва исломнинг пайдо бўлиши ва кенг тарқалиши билан уларнинг таълимотларида «дўзах» ва «жаннат» тушунчалари кенг ва батафсил ўз ифодасини топган. Бу диний таълимотларга эътиқод қилувчилар тасаввурида «дўзах» тушунчаси чуқур мазмунга эга бўлиб, диндорларни гуноҳ ишлардан қайтариш, яхши савобли ишларни кўпроқ бажаришга чорлайди.