Давлат байроғи – ҳар қандай давлатнинг ўтмиши, давлатчилик анъаналари, сиёсий тузуми, иқтисодий салоҳиятини ифода этадиган рамзлардан бири. Давлат байроғи махсус қонун билан ёки Конституция асосида расмийлаштирилади. Давлат байроғи – мустақил давлат ва унда яшовчи фуқаролар дахлсизлигининг аниқ ифодасидир. Давлат байроғи айни шу давлатдаги миллий, ҳарбий ва партиявий бирлик ҳамда уюшмаларнинг ҳам рамзий белгисидир. Давлат байроғи одатда бир рангли ёки кўп рангли матодан иборат бўлиб, унинг бир томони дастага маҳкамланади. Матога баъзан турли эмблема ва белгилар туширилади (масалан, Швейцария байроғида оқ рангли хоч, Шри-Ланка байроғида – қилич ушлаган шер, Канада байроғида – заранг дарахтининг япроғи тасвирланган). Давлатнинг рамзий белгиларидан бири сифатида давлат байроғининг шаклланиш тарихи узоқ даврларга бориб тақалади.

Давлат бошқариш амалиётида давлат раҳбари (подшоҳ, қирол, император, амир, хон ва бошқалар) атрофидагилардан расмий қабул қилинган ва фақат давлат раҳбари кийиши мумкин бўлган либос билан ажралиб турган. Шу қоидани давом эттириб, давлат раҳбари яшайдиган ёки ишлайдиган иморат ва бинога, дала шароитида – чодирга, ҳарбий юриш вақтида – бош қўмондон ҳаракат воситасига махсус узун таёқ ёки найзага мустаҳкамлаб қўйилган, кўпинча турли суратлар (шер, бургут ва шу кабилар) билан безатилган мато давлат рамзи ва белгиси сифатида ўрнатилган. Давлат байроғи давлат мустақиллигининг рамзи сифатида давлат раҳбари ишлайдиган жойда, олий қонун чиқарувчи орган, ҳукумат, давлат ташкилотлари, элчихона ва консуллик биноларида, халқаро қатновдаги ҳаво ва денгиз кемаларида ҳамда қонунда белгиланган бошқа вазиятларда кўтарилади. Ўзбекистон давлат байроғи Ўзбекистон Республикаси Олий Кенгаши сессиясида 1991 йил 18 ноябрда қабул қилинган. Давлат байроғини ҳақорат қилган шахс Жиноят Кодексига биноан жазога тортилади.