Гимнастика – жисмонан ва маънан баркамол инсонларни тарбиялаш воситаси, тўғри қоматни шакллантириш, соғлиқни мустаҳкамлаш, иродавий фазилатларни тарбиялаш, ҳаракатларни моҳирона, енгил ижро этишга ўргатиш жараёни. Гимнастика таълим-тарбиявий ва соғломлаштириш жараёнларининг ажралмас қисмидир. Жисмоний машқларни бажариш – инсон, айниқса, ёшлар саломатлигини мустаҳкамлаш масалаларини ҳал қилиш шартларидан биридир. Зеро, кам ҳаракатлилик организмнинг кўпгина функцияларига салбий таъсир этиб, қатор касалликларнинг пайдо бўлиш ва ривожланиш омили ҳисобланади. Шундай қилиб, гимнастика кенг маънода, инсонларнинг саломатлигини мустаҳкамлаш, меҳнат фаоллигини ошириш, умрини узайтириш, меҳнат, турмуш, дам олиш шароитларини яхшилаш, бир сўз билан айтганда, соғлом турмуш тарзини қарор топтиришга йўналтирилган тарбия усулидир. Бу эса аҳоли саломатлигини мустаҳкамлаш, жисмонан соғлом, маънан баркамол ёш авлодни тарбиялаш, фуқароларни жисмоний тарбия ва спорт билан фаол шуғулланишга кенг жалб этишга хизмат қилади.