Геронтология – биология ва тиббиётнинг тирик мавжудотлар, шу жумладан, инсоннинг қаришига оид қонуниятларни ўрганувчи соҳаси. Геронтологиянинг вазифаси қаришнинг илк аломатларини аниқлаш, организм ҳаёт фаолияти жараёнида уларнинг бир-бири билан алоқадорлигини белгилаш, тирик мавжудотнинг атроф-муҳитга мослашувининг омили билан боғлиқ жиҳатларини тадқиқ этишдан иборат. Геронтология қарилик жараёнининг моҳияти, ўзига хос хусусиятини ўрганиш унинг ирсий, биологик, ижтимоий, маънавий ва ахлоқий жиҳатларини ҳар томонлама таҳлил қилиш имконини яратади.

Геронтологик тадқиқотлар кекса ва қари ёшдаги кишиларга хос бўлган касалликларнинг сабабларини аниқлаш, олдини олишнинг самарали чораларини ишлаб чиқишга йўналтирилган. Геронтологиянинг инсонни ўрганувчи йўналиши – ижтимоий геронтология соҳасида кекса ёшдагилар учун тинч, осойишта шароит яратиш, ҳаётини мазмунли қилиш уларнинг ҳаётий тажрибасидан ёш авлодни тарбиялаш жараёнида фойдаланиш, кексаларни жамият ишларига кенг жалб этиш масалалари ўрганилади.