Бўш вақт – вақт шаклларидан бири бўлиб, кишининг ишдан ташқари вақтининг бир қисми, унинг жисмоний ёки ақлий меҳнат билан шуғулланмайдиган, баъзида эса жисмонан ва руҳан ҳордиқ олиш учун ажратадиган вақтни англатувчи тушунча. Бўш вақт шахснинг ҳар томонлама такомиллашуви, дам олиши, ўқиши, умуман, ўзининг билим даражасини, ишлаб чиқариш малакасини ошириш учун, жамоат иши, жисмоний тарбия, спорт машғулотлари ва бошқа маънавий эҳтиёжларини қондириш учун фойдаланадиган ишдан ташқари вақтидир. Бўш вақт куч-қувватни тиклашга, жисмоний ва маънавий тараққиётга, шунингдек шахснинг ўз устида ишлашига, маданий ҳордиқ чиқаришига, ижтимоий-сиёсий фаоллик кўрсатишига, ҳаваскорлик фаолиятига сарф қилинади. Бўш вақт пассив ҳордиқ – «ҳеч нарса қилмасликни» ҳам ўз ичига олади. Бўш вақтнинг ижтимоий қадрият сифатидаги салмоғи унинг ҳажми, тизими ва мазмуни билан ўлчанади. Кейинги даврларда бўш вақт ҳажми ўсиб бормоқда. Бу ўсиш меҳнатда техникадан кенг фойдаланиш, маиший эҳтиёжларга (йўлга, уй ишларига, болалар тарбиясига ва бошқалар) сарфланадиган вақтнинг қисқариб бораётганлиги билан белгиланади. Бўш вақт масаласи соғлом турмуш тарзини қарор топтириш билан узвий боғлиқ.

Мустақиллик йилларида Ўзбекистонда бўш вақтни самарали ўтказиш учун кенг имкониятлар яратилган. Жумладан, мамлакатимизда кўплаб театрлар, музейлар, кутубхоналар, турли маданий-маиший тўгараклар фаолият юритмоқда. Лекин мавжуд имкониятлардан оқилона фойдаланиш ҳар бир кишининг ўзига, унинг дунёқарашига боғлиқ. Киши бўш вақтга бекорчи вақт деб қарамаслиги, уни фақат маишат, беҳуда кўнгилхушлик билан ўтказмаслиги лозим. Оилада, авваламбор, бўш вақтни режали ташкил қила билиш керак. Унда маданий-маиший муассасаларга бориш, китоб мутолаа қилиш, спорт билан шуғулланишга алоҳида ўрин ажратиш зарур. Ижодий меҳнат қилиш, малака, илмий-маданий савияни ошириш, адабиёт ва санъат билан шуғулланиш бўш вақтни мазмунли ўтказишнинг асосий омилидир. Айниқса, оилада болалар нинг бўш вақтини тўғри ташкил қилишга алоҳида эътибор бериш зарур. Уларнинг бўш вақтини нотўғри ташкил қилиниши турли ижтимоий хавф-хатарлар: безорилик, ичкиликбозлик, жиноятчиликнинг ўсишига олиб келиши мумкин. Болаларни турли тўгаракларга, жамоат ишларига жалб қилиш, қизиқарли, мазмунли ўйинлар билан банд этиш, бадиий китоблар ўқишларига аҳамият бериш лозим. Умуман, бўш вақтдан самарали фойдаланиш турмушнинг мазмунли бўлишига хизмат қилади.