СУҲБАТ

– Бу нарса кичкина бўлганига қарамай кўп иш бажаради, шуниям ҳисобга олинг. Сигаретангизни филтирлайди, иссиқлигини ўзида тутиб қолади, камига қўлингизга тамаки ҳиди ўтиришига йўл қўймайди.

– Хўш, нархи қанча?

– 35 доллар. Келиштириб бераман.

– Ўҳ-ҳў, қиммат экан роса?

– Ўлим бошқа жойда бунчалик арзонга сотилмайди, ука...

“ЗАРАРКУНАНДА”

Сўнгги йилларда қайноқ ижодий жараёнда яшаб ўнлаб китоблар чиқарган шоир бир кун шогирдига нолиди:

– Эй, уйни таракан босиб кетди. Бошим қотган, нима қилишни билмай гарангман...

Шогирд мўмин юз-кўзини ўйнатиб:

– Мен биламан йўлини, – деди, – ҳар кун ишдан келганингизда ярим соат-бир соат шеър айтинг, зерикканидан ўлиб қолишади шунда бечоралар...

ЗАМОНАВИЙ ДОМЛА

Маъруза хонаси жимжит эди. Фақат домланинг йўғон овози эшитилар, у ярим соатдан бери тинмай гапирарди.

– Бу домланинг ихтисослиги нима экана? – деди Бекмурод курсдошига.

Ёзишдан бўшамаётган Муҳаммад:

– Бу домла... – дедию сўзи кесилди.

– Бу домланинг ихтисослиги қўрқитиш, талабани йилдан-йилга қолдириш фанлари докторини ҳам олган, – деди уч йилдан бери шу курсда ўқиётган Бахтиёр.

“ТИЛАК”

У ҳар кунги одатига мувофиқ янги пивохонага кирди. Яқинда очилганмиш бу ер. Ярим соат навбат кутгач, доим ичадиган “баночний”сидан олди. Ёш сотувчи пулни олгач, жилмайди:

– Саломат бўлинг!

Раҳмат Бобожон