Амри маъруф (арабча яхшиликка буюриш) – кишиларни яхшилик қилишга, эзгу интилиш ва мақсадларга чорлашни англатувчи тушунча.

Ҳозирги пайтда кишилар ўртасида меҳр-оқибат, ўзаро ижтимоий ҳамкорлик, яқин қўни-қўшничилик муносабатларни кучайтириш, ёшлар онгида «оммавий маданият», ғарбона ҳаёт тарзи, миллийликдан чекиниш каби салбий ҳолатларнинг олдини олишда амри маъруф доирасидаги ваъз-насиҳатларнинг фойдаси катта. Шу боис, расмий равишда жомеъ масжидларда жума намози олдидан, ТВнинг махсус «Зиё», «Ҳидоят сари» каби кўрсатув ва эшиттиришлари, газета ва журналлардаги айрим рубрикаларда амри маъруф доирасидаги насиҳатлар бериб борилаётгани диққатга сазовордир. Турли эзгу мақсадлар билан ўтказиладиган маъракалар, хайру-эҳсон шаклидаги диний маросимларда қилинадиган амри маъруфда руҳонийлар томонидан ислом дини қоида-амалларига, шариат аҳкомларига риоя этишга, савоб-эзгу ишларни бажаришга даъват этиш, чорлаш мақсадида қилинадиган маъруза ва ваъзлар амри маъруфнинг мазмун-моҳиятини ташкил этади.